Sunday, August 7, 2022

രക്തം നിറഞ്ഞ മുറി

അജേഷ് നല്ലാഞ്ചി

വണ്ണാമ്പല നിറഞ്ഞ
ഈ ഗുഡുസു മുറിക്ക്
ഓലക്കണ്ണി നനഞ്ഞ മണമാണ്..
ചുമർ നിറയെ
ചൊട്ടപ്പുഴുക്കളാണ്…

പല്ലി
പാറ്റ
തേരട്ട
കരിങ്കണ്ണി
അണങ്ങ്
ചേക്കാലി
പിന്നെ പേരറിയാത്ത
അനേകം ചെറുജീവികളുടെ സത്രം..

ചിതൽ
പുറം ജനാലയ്ക്ക് താഴെ ചാരി വച്ച
മാച്ചിപ്പട്ട വഴി
ഏത് നിമിഷവും അകത്ത് കയറും….

നീ
ഇവിടെ ഉപേക്ഷിച്ച് പോയ
കളർ പെൻസിലുകൾ കൊണ്ട്
ഞാൻ ഓർമയെ
വരച്ചെടുക്കുകയാണ്…..

വസന്തമെത്തും മുൻപ്
നീ വരുമെന്ന്
എനിക്കൊരുറപ്പുമില്ല…….

ഈ മുറിയുടെ വാതിലിന്മേൽ
ടക് ടക് ടക്
എന്ന് നിന്റെ വിരലുകൾ ശബ്ദിക്കുന്നത് കേട്ട്
ഞാനുണരുമോ എന്നും
ഉറപ്പില്ല….

പല്ലിയോടൊ
പാറ്റയോടൊ
കരിങ്കണ്ണി ഇത്യാദികളോടോ
നിനക്ക് സംവദിക്കാനറിയില്ലെന്നത് കൊണ്ട് തന്നെ


ചിത്രങ്ങളുടെ
ജീവശാസ്ത്ര രഹസ്യങ്ങൾ
നിനക്ക്  കണ്ടെത്താനാവില്ല…

വരൂ
ഭക്ഷിക്കൂ

മുറിയിലെ
രക്തം എന്ന്
കഴുക്കോലിൽ തൂങ്ങുന്ന
വയസ്സൻ വവ്വാല്
നിന്നോട് പറയും….

വരൂ
ഭക്ഷിക്കൂ

മുറിയിലെ
രക്തം….


ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം) editor@athmaonline.in, +918078816827


ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.

spot_img

Related Articles

നീന്തൽ

കവിത  യഹിയാ മുഹമ്മദ് കടൽ. കുഞ്ഞിനെ കൈവെള്ളയിൽ കിടത്തി കരയിലേക്ക് നീന്താൻ പഠിപ്പിക്കുന്നു. വെള്ളത്തിൽ നീന്തുന്നത് പോലെ എളുപ്പമല്ലല്ലോ കരയിലെ നീന്തൽ കല്ലും മുള്ളും നിറഞ്ഞത് കൊണ്ട് മേനിയാകെ ഉരഞ്ഞു പൊട്ടും. കടൽ കുഞ്ഞ് നീന്തി നീന്തി നാടും കാടും കടന്ന് മലയുടെ ഉച്ചി വരെയെത്തി. കടലെത്ര തിരിച്ചുവിളിച്ചിട്ടും അവനുച്ചിയിൽ നിന്ന് താഴെക്കിറങ്ങി വന്നതേയില്ല. കുഞ്ഞുങ്ങൾ. വികൃതിക്കുരുന്നുകളുണ്ടോ പറയുന്നത് കേൾക്കുന്നു! നീന്തിപ്പോയ...

പനി ചലനങ്ങൾ

കവിത ജാബിർ നൗഷാദ് മൂടൽ മഞ്ഞുപോലെയാകാശം നിലാവ് തെളിക്കുന്ന തണുത്ത രാത്രിയിൽ പിറവിയെ പഴിച്ചിരിക്കുന്ന പനി വിരിഞ്ഞയുടൽ, നിറം മങ്ങിയുറുമ്പു കടിച്ചു നീലിച്ച ആദാമിന്റെ ആപ്പിൾ കഷ്ണം. നാവികനെ കാത്ത് കടൽതീരത്തിരിക്കുന്ന മത്സ്യകന്യകയുടെ കണ്ണുകൾ, ശപിക്കപ്പെട്ട കാഴ്ച. ഇലകളുടെ നിഴലിൽ നിന്നും കിളിർത്തു വരുന്ന വെളുത്ത പൂവ്, കാറ്റ് തട്ടി ആകാശത്തേക്ക് കൊഴിയുമ്പോൾ ഞാൻ കഥയെഴുതുന്നു. അന്ത്യമില്ലാത്ത...

ട്രോൾ കവിതകൾ – ഭാഗം 14

വിമീഷ് മണിയൂർ കടം വാങ്ങിയ ഒന്ന് പണ്ട് നൂറിൽ നിന്ന് ഇരുപത്തൊമ്പത് കുറയ്ക്കുന്നതിനു വേണ്ടി ഇടത്തേ അറ്റത്തു നിന്ന് കടം വാങ്ങിയ ഒന്നിന് വേണ്ടി എണ്ണൽ സംഖ്യയിലെ ഒന്ന് രാവിലെ എന്നെ കാണാൻ വന്നു. പതിനാറ് വർഷവും...
spot_img

Latest Articles