സുരേഷ് നാരായണൻ

‘revenge is a dish best served cold’

ഇന്നോളം ഇറങ്ങിയിട്ടുള്ള ഉള്ള പ്രതികാര/ത്രില്ലർ സിനിമകളുടെ ‘പ്രതിപ്പട്ടികയിൽ ‘ ഇപ്പോഴും ഒന്നാം സ്ഥാനത്തുള്ള Kill Bill തുടങ്ങുന്നത് ഈയൊരു വാചകത്തോടെയാണ്  .

പുതിയ സാങ്കേതികവിദ്യകൾ ഇത്തരം സിനിമകളുടെ മേക്കിങ് എളുപ്പമാക്കി തീർക്കുന്നു എന്ന് തോന്നിയേക്കാമെങ്കിലും, അതിനെത്രയോ മുകളിൽ ഉയർന്നു പറക്കുന്ന പ്രേക്ഷകന്റെ സാമാന്യബുദ്ധിയെ ‘ബീറ്റ് ‘ചെയ്യാത്തിടത്തോളം അത് ഒരു വെല്ലുവിളി മാത്രമാണ്.

പുതുമലയാള സിനിമ അധികം പരീക്ഷിക്കാത്ത ഒന്നാണ് ഇത്തരം ത്രില്ലറുകൾ. മെമ്മറീസ്ആ ണെന്നു തോന്നുന്നു ഈ ജോണറിൽ ഇറങ്ങിയ ലക്ഷണമൊത്ത സിനിമകളിൽ അവസാനത്തേത്.

ആ ഒരു വിടവിലേക്കാണ് തല ഉയർത്തിപ്പിടിച്ച് ‘അഞ്ചാം പാതിര’യുടെ പ്രവേശനം. അതും തീരെ പ്രതീക്ഷിക്കാത്ത മിഥുൻ മാനുവൽ തോമസ് എന്ന സംവിധായകനിൽ നിന്ന്.

‘ആട്’ സീരീസ് സിനിമകൾ ചെയ്ത സംവിധായകൻറെ തോലിനടിയിൽ ഇങ്ങനെയൊരു ചെന്നായ് ഒളിച്ചിരിപ്പുണ്ടായിരുന്നോ എന്ന് അത്ഭുതം കൂറാൻ പോലും സമയം തരാതെ രണ്ടരമണിക്കൂർ മുഴുവനായും നമ്മെ സീറ്റിനോട് ബന്ധിച്ചിടുന്നു  അയാൾ !

കാലം വീര്യം കൂട്ടിയ ഒരു പ്രതികാര വാഞ്ഛയും അതിൻറെ ചങ്കിടിപ്പേറ്റുന്ന ആവിഷ്കാരവും തന്നെയാണ് സിനിമയുടെ ഹൈലൈറ്റ്.

ഉദ്വേഗങ്ങൾ കാത്തുവെച്ച വളവുകളും, ആകാംക്ഷയുടെ വിളുമ്പുകളിൽ നിന്ന് നിരാശയുടെ പടുകുഴികളിലേക്ക് പതിക്കുമ്പോഴുണ്ടാകുന്ന നിസ്സഹായതകളും investigation  ടീം മാത്രമല്ല, പ്രേക്ഷകനും പങ്കിട്ടെടുക്കുന്നു.

മാത്യു തോമസിന്റെയും ജാഫർ ഇടുക്കിയുടെയും കഥാപാത്രങ്ങളെ വളരെ സമർഥമായുപയോഗിച്ച് പ്രതികാരം എന്ന elementന്റെ വിളക്കിച്ചേർക്കൽ  വളരെ കൺവിൻസ്സിംഗ് ആയി നിർവ്വഹിച്ചിട്ടുണ്ട് സംവിധായകൻ.

ഷൈജു ഖാലിദ്- സുഷിൻ ശ്യാം ജോഡി യാകട്ടെ, ഇരട്ട സഹോദരന്മാരെപ്പോലെ ജോലിചെയ്തു തങ്ങളുടെ ഭാഗം ഗംഭീരമാക്കിയിരിക്കുന്നു.

സ്റ്റാർഡം ഒട്ടും ആവശ്യമില്ലാത്ത രീതിയിലാണ് കേന്ദ്രകഥാപാത്രമായ അൻവർ ഹുസൈൻ എന്ന ക്ലിനിക്കൽ സൈക്കോളജിസ്റ്റ് കഥാപാത്രത്തെ രൂപപ്പെടുത്തിയിരിക്കുന്നത്. ‘എൻറെ റോൾ- അത് മറ്റാർക്കും ചെയ്യാൻ പറ്റില്ല’ എന്ന വാചകത്തിന് ഇവിടെ പ്രസക്തിയില്ല.കുഞ്ചാക്കോ ബോബനു മാത്രമല്ല, ഇന്ദ്രജിത്ത് -ജയസൂര്യ -ടോവിനോ തുടങ്ങിയവർക്കും വഴങ്ങുന്ന തരത്തിലുള്ള ഒന്ന്. അതുകൊണ്ടുതന്നെ ചാക്കോച്ചന് ഈ റോൾ ഉജ്ജ്വലമായ  ഒരു പുതുവത്സര സമ്മാനമാണ് .

കഥാപാത്രങ്ങളോട് നീതി പുലർത്തുന്ന രീതിയിൽ തന്നെയാണ് മറ്റു നടന്മാരുടെ തിരഞ്ഞെടുപ്പും. ഉണ്ണിമായ അവതരിപ്പിക്കുന്ന കഥാപാത്രത്തിന്റെ ഡയലോഗ് ഡെലിവറി കുറച്ചുകൂടെ ചടുലമാക്കിയിരുന്നെങ്കിൽ സിനിമയുടെ മൂഡുമായി ഒത്തു പോയേനെ എന്നു തോന്നി.

എന്തൊക്കെയായാലും 2020 ന്റെ തുടക്കത്തിൽ ഇറങ്ങിയ ഈ സിനിമ അക്ഷരാർത്ഥത്തിൽ ഒരു ട്വൻറി -ട്വൻറി ആകുന്നുണ്ട്. ഇതൊരു സീരീസ് ആയി ഡെവലപ്പ് ചെയ്യുന്ന കാര്യം സംവിധായകന് ആലോചിക്കാവുന്നതാണ്.

More power to him, and More tension to the audience!