നെതര്‍ലാന്‍ഡ് രാജാവ് വില്യം അലക്സാന്‍ഡര്‍, രാജ്ഞി മാക്സിമ എന്നിവരുടെ കേരള സന്ദര്‍ശന വേളയിലെ ഔദ്യോഗിക സ്വീകരണത്തിന്‍റെ ഭാഗമായി അവതരിപ്പിക്കപ്പെട്ട, കേരള ഡച്ച് ചരിത്രം ദൃശ്യവല്കരിച്ച ‘Giethoorn to Kerala’ എന്ന മള്‍ട്ടിമീഡിയ മെഗാ ഷോയ്ക്ക് നെതര്‍ലാന്‍റ് സംഘം പ്രത്യേക അഭിനന്ദനം അറിയിച്ചു,
വിവിധ മേഖലകളിലെ 65 ഓളം കലാപ്രതിഭകള്‍ അണിനിരന്ന ദൃശ്യ വിരുന്ന് സ്ക്രീന്‍, സ്റ്റേജ്, വിറ്റ്നസ് കോര്‍ട്ട് എന്നീ മൂന്ന് ഇടങ്ങളിലായാണ് പുതുമയാര്‍ന്ന ശൈലിയില്‍ അവതരിപ്പിക്കപ്പെട്ടത്.
ഡച്ച് ഇന്ത്യന്‍ സംഗീത ധാരകളും പെയിന്‍റിങ്ങുകളും രേഖാചിത്രങ്ങളും സമന്വയിപ്പിച്ച് ഡച്ച് കേരള ചരിത്രത്തെ അടയാളപ്പെടുത്തിയ സവിശേഷ ദൃശ്യങ്ങളിലൂടെയാണ് ഹൃദ്യമായ ഈ അവതരണം കടന്നുപോയത്. ഡച്ച് ഇന്ത്യന്‍ ഫ്യുഷന്‍ ഡാന്‍സ്, ഡച്ച് സംസ്കൃതിയെ അവലംബിച്ച് ഉറൂബ് എഴുതിയ മുളകുവള്ളികള്‍ എന്ന കഥയുടെ തിയേറ്റര്‍ ആവിഷ്കാരം, മൈം, നിറങ്ങളെ അവലംബിച്ചുള്ള നൃത്താവിഷ്കാരം, കേരളീയ കലാരൂപങ്ങളുടെ ദൃശ്യസമന്വയം എന്നിവ വിളക്കിചേര്‍ത്തതാണ് ഡച്ച് കേരള ചരിത്രത്തിന്‍റെ ദൃശ്യാവിഷ്കാരം പൂര്‍ത്തിയായത്. പതിനേഴാം നൂറ്റാണ്ടിലെ ഡച്ച് കേരള സൗഹൃതാരംഭം മുതല്‍ കേരള മുഖ്യമന്ത്രി നെതര്‍ലാന്‍ഡ് സന്ദര്‍ശിച്ച് ഉടമ്പടികള്‍ക്ക് തുടക്കം കുറിച്ചത് വരെയുള്ള ചരിത്ര സാക്ഷ്യങ്ങളാണ് നെതര്‍ലാന്‍ഡ് രാജാവിനും രാജ്ഞിക്കും കേരള മുഖ്യമന്ത്രിക്കും വിവിധ വകുപ്പ് മന്ത്രിമാര്‍ക്കും ക്ഷണിക്കപ്പെട്ടവര്‍ക്കും മുന്നില്‍ കൊച്ചി താജ് മലബാറില്‍ അരങ്ങേറിയത്.
മുപ്പത് മിനുറ്റുള്ള അവതരണത്തെ നിറഞ്ഞ കൈയ്യടികളോടെ സ്വീകരിച്ചശേഷം, ഈ അവതരണം ഒരിക്കയതിലുള്ള ആഹ്ളാദവും നന്ദിയും രാജാവ് മുഖ്യമന്ത്രിയെ ഹസ്തദാനം ചെയ്ത് അറിയിച്ചു. വേദിയിലെത്തിയ രാജ്ഞി കലാസംഘത്തെ അഭിനന്ദനം അറിയിച്ചു. കലകളുടെ വൈവിധ്യങ്ങളിലൂടെ നൂറ്റാണ്ടുകളുടെ ചരിത്രം അവതരിപ്പിച്ച ദൃശ്യവിരുന്ന് ഈ സന്ദര്‍ശനവേളയിലെ മറക്കാനാവാത്ത അനുഭവമാണെന്ന് നെതര്‍ലാന്‍ഡ് സംഘം അഭിപ്രായപ്പെട്ടു. പൊതുഭരണ വകുപ്പിനുവേണ്ടി കേരള സര്‍ക്കാരിന്‍റെ സാംസ്കാരിക വിനിമയ കേന്ദ്രമായ ഭാരത് ഭവന്‍ ഒരുക്കിയ ഈ അവതരണത്തിന് സാക്ഷാത്കാരം നിര്‍വഹിച്ചത് നാടക ചലച്ചിത്ര സംവിധായകനായ പ്രമോദ് പയ്യന്നൂരും സംഘവുമാണ്.
