രാഹുൽ മണപ്പാട്ട്
പതിനാറാം വയസ്സിൽ
കന്യകനായി
അവൻ അവളുടെ
കുളിമുറി വിട്ടിറങ്ങുന്നു.
ചായ്പ്പില്
ഏഴ് ദിവസത്തിന്റെ ചൊരുക്കിലേക്ക് പായ വിരിച്ചിട്ടു.
ചുവരുകൾ നോക്കി
മുളച്ച രോമങ്ങളെ എണ്ണം പടിപ്പിച്ചു.
കക്ഷത്തില് വിയർപ്പിനെ
സൂക്ഷിച്ചു വെച്ചു.
തലയിൽ പേനുകളെ
വളർത്തി.
മുഖക്കുരു വെയില്
കൊള്ളിക്കാതെ പഴുപ്പിച്ചു.
മുലകണ്ണുകളെ പറത്തിവിട്ടു.
മീശപിരിച്ച്
പുകവലിച്ചു.
ഉള്ളിലെവിടെയോ
ഒരു കാടുണ്ടെന്ന്
ഉദ്ധരിച്ച ആ ഒറ്റമരം
ചില്ലകൾ
കുലുക്കി പറഞ്ഞു.
അപ്പുറത്തെ
കക്കൂസിലെ അരഞ്ഞാണം
മുറുക്കി
സിഗരറ്റിന്റെ നാണത്തിലേക്ക്
അവൻ അവളെ പലതവണ
വെള്ളമൊഴിച്ചുകളഞ്ഞു.
ഓരോ നിമിഷവും വയസറിയിക്കുമ്പോൾ
തുറന്നിട്ട പൈപ്പിലൂടെ
വെള്ളം കോരാൻ
കിണറുകുത്തികൾ
കൈവിരലുളുടെ മലകേറി
വന്നു.
എന്നിട്ടും
ഉറക്കത്തിൽ
ചോര പൂക്കാത്ത
അടിവസ്ത്രത്തിലേക്ക്
പല രാത്രികളുടേയും
ചൂടിറക്കി വെക്കുമ്പോൾ
നഖങ്ങൾക്കുള്ളിൽ
ഗർഭപാത്രം സ്ഖലിച്ചിറങ്ങി.
തെറിച്ചുവീഴുമ്പോൾ
ഒട്ടിപ്പിടിച്ച കാലുകൾ വിടർത്തി
ഏഴാമത്തെ
കുളി തെറ്റിച്ച് അവൻ
കന്യകന്മാരുടെ നാട്ടിലേക്ക്
കിതച്ചു പായും.
ആത്മ ഓൺലൈനിലേക്ക് നിങ്ങൾക്കും കവിതകൾ അയക്കാം:
8086451835 (WhatsApp)
editor@athmaonline.in
