Thursday, June 24, 2021

കട്ട ലോക്കൽ അമ്മമാർക്ക്

കവിത

നവീൻ എസ്

അച്ഛന്റെ പ്രശ്നങ്ങൾ ഇന്റർനാഷണലാണ്.
അമ്മയുടേതാകട്ടെ
കട്ട ലോക്കലും.

ആഗോള താപനത്തിന്റെ തോതിൽ
അച്ഛൻ ഉത്കണ്ഠാകുലനാകുമ്പോൾ,
സ്കൂൾ വിട്ട് വന്ന മകന്റെ പനിച്ചൂട്
അമ്മയെ പരിഭ്രമിപ്പിക്കുന്നു.

സ്ത്രീവിരുദ്ധ ചെയ്തികൾക്കെതിരെ അച്ഛൻ വാചാലനാകുമ്പോൾ,
മകൾക്ക് നേരെ നീളുന്ന കണ്ണുകൾ
അമ്മയെ ഭയപ്പെടുത്തുന്നു.

രാജ്യാന്തര അതിർത്തിത്തർക്കങ്ങൾ അച്ഛനെ അലോസരപ്പെടുത്തുമ്പോൾ,
മകനും മകൾക്കുമിടയിലെ വഴക്ക്
അമ്മയെ വിഷമത്തിലാക്കുന്നു.

പ്രകൃതി വിഭവശോഷണത്തെ പറ്റി
അച്ഛൻ ചിന്താകുലനാകുമ്പോൾ,
അടുക്കളയിലെ ഇല്ലായ്മകളെ പറ്റി
അമ്മ പരാതിപ്പെടുന്നു.

ദേശീയതയുടെ പേരിലെ കരി നിയമങ്ങൾ
അച്ഛനെ വേവലാതിപ്പെടുത്തുമ്പോൾ,
വീട്ടിൽ നിറയുന്ന പാറ്റകളെ പറ്റി
അമ്മ ആവലാതി പറയുന്നു.

അച്ഛന്റെ പ്രശ്നങ്ങൾ ദിനംപ്രതി പുതിയതാണ്.
അമ്മയുടേതോ കാലപ്പഴക്കമേറിയവയും.
അച്ഛന്റെ പ്രശ്നങ്ങൾ എണ്ണിയാലൊടുങ്ങില്ല.
അമ്മയുടേതാകട്ടെ വിരലുകളാലെണ്ണിയെടുക്കാം.

അയഥാർത്ഥ ലോകത്തിരുന്ന്
അച്ഛൻ തന്റെ ഇന്റർനാഷണൽ പ്രശ്നങ്ങളോട് പ്രതികരിക്കുമ്പോൾ,
യഥാർത്ഥ ലോകത്തിരുന്ന്
അമ്മ തന്റെ കട്ട-ലോക്കൽ
പ്രശ്നങ്ങൾ പരിഹരിക്കുന്നു.

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം) editor@athmaonline.in, WhatsApp : 80 788 16827

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.

Related Articles

ഉപ്പയില്ലാത്ത ഞാൻ

ബഹിയ ഉപ്പയില്ലാതായതിൽ പിന്നെയാണ് ഞാൻ സ്വതന്ത്രയായത്. അടിക്കടി ഫോണിൽ വിളിച്ച് എവിടെയാണെന്നും എന്താണെന്നും ഇനിയെപ്പോളിങ്ങ് എത്തുമെന്നും ഇനിയാരും തിരക്കില്ലല്ലോ. വരാനിരിക്കുന്ന പരീക്ഷയെക്കുറിച്ച് നിത്യേനയെന്നോണം ഓർമ്മിപ്പിച്ച് സ്വന്തം കാലിൽ നിൽക്കാൻ ഇനിയാരും പ്രേരിപ്പിക്കില്ലല്ലോ. ചുവന്ന ജിലേബിയും പലഹാരങ്ങളും വാങ്ങിവെച്ച്, കാണുമ്പോഴെല്ലാം വഴക്കു പറഞ്ഞു കഴിപ്പിച്ച് ഇനിയാരുമൊരിക്കലും ഡയറ്റിങ്ങ് തെറ്റിക്കയുമുണ്ടാവില്ല. കാണണോരുടെ മുഴുവൻ പറച്ചിലിനുമപ്പുറം സ്വന്തം കാലുകൾക്കു പോലും...

ഉട്ങ്കല്ത്ത കുപ്പായം

ധന്യ വേങ്ങച്ചേരി ഭാഷ : മാവിലൻ തുളു ഇനി പഠിപ്പ്ക്ണത്ണ്ട് പണ്ട് ടീച്ചെറ് ചോക്കെറ്ത് ബോർഡ്ട്ട് ബരെയെനക തെരെമാലെ മാതിരി ബർത്തടങ്ക്ത് പോക് പുസ്തകം മക്ട്പ്പ്ക്ന കൂറ്റ് കാട്ട് മുല്ലെ തൈ അറ്കറ്കെ കൊള്ളി ച്മ്പ്ത് നിന്റിപ്പ്ക്ണ മാതിരി അ ള ,ഇ ള ,...

ആമ്പലും തത്തയും

മണിക്കുട്ടൻ ഇ കെ ആരോ ആത്മഹത്യ ചെയ്ത മുറിയിലാണ് ഞാനിപ്പോൾ. മുറിയിലെ പഴകിയ ചോരപ്പാടുകൾ, ഇരുട്ട്, അലർച്ചകൾ, എന്തൊക്കെയോ മണങ്ങൾ എല്ലാം ചേർന്ന് പേടിപ്പെടുത്തുന്നു. എത്ര കുതറിയിട്ടും ഉണരാനാവാതെ തളരുന്നു. ഒടുക്കം എല്ലാ കരുത്തും ആവാഹിച്ച ഒരലർച്ചയിൽ കൺതുറന്ന് കിതയ്ക്കുന്നു. ഉണർന്നത് രണ്ടാം സ്വപ്നത്തിലേക്കായിരുന്നു. നിറയെ ആമ്പലുകളുള്ള വയലോരം. അവൾ എന്നോട് ചേർന്നിരിക്കുന്നു. ആമ്പലിന്റെ മണം ഞങ്ങളെ മൂടുന്നു. സാരിയിൽ...

Leave a Reply

Stay Connected

14,715FansLike
18FollowersFollow
1,170SubscribersSubscribe

Latest Articles

error: Content is protected !!
WhatsApp chat