Monday, September 28, 2020
Home സാഹിത്യം പുസ്തകപരിചയം ഓർമയിലെ നക്ഷത്രങ്ങൾ

ഓർമയിലെ നക്ഷത്രങ്ങൾ

വായന

സഹർ അഹമ്മദ്

പുസ്തകം : ഓർമയിലെ നക്ഷത്രങ്ങൾ
രചന: ഡോ. കെ.പ്രസീത
പ്രസാധകർ: പ്ലാവില ബുക്സ്
വില: 90 രൂപ
പേജ്: 64

കണ്ണൂർ പേരളശ്ശേരി എ.കെ.ജി. സ്മാരക ഗവ: ഹയർസെക്കൻഡറി സ്‌കൂളിൽ മലയാളം അദ്ധ്യാപികയായി ജോലി ചെയ്യുന്ന ഡോ. കെ. പ്രസീതയുടെ ആദ്യ കവിതാസമാഹാരമാണ് “ഓർമയിലെ നക്ഷത്രങ്ങൾ”. വ്യത്യസ്ത വിഷയത്തിലുള്ള 30 കവിതകളാണ് ഈ പുസ്തകത്തിൽ സമാഹാരിച്ചിട്ടുള്ളത്.

ormayile-nakshathrangal-athmaonline-cover

പുസ്തകത്തിന്റെ അവതാരികയിൽ പ്രശസ്ത എഴുത്തുകാരൻ ഡോ. സോമൻ കടലൂർ ഇങ്ങനെ അഭിപ്രായപ്പെടുന്നു.. “സമകാലിക ജീവിതത്തെ വിമർശനാത്മകമായി സമീപിക്കുകയും അനുഭവങ്ങളോട് സത്യസന്ധമായി പ്രതികരിക്കുകയും ചെയ്യുന്ന കവിയാണ് പ്രസീത. കെ. പുതുകവിത ആർജിച്ച ഭാഷാപരവും പ്രമേയപരവുമായ ഭാവുകത്വപരിസരത്തിൽ നിന്നു കൊണ്ട് ഏറെ സജീവമായ അക്ഷരപ്പെരുക്കങ്ങളായി തീർന്ന കവിതകളാണ് ഈ സമാഹാരത്തിൽ ഏറെയും മനുഷ്യവംശത്തിന്റെ അപരിഹാര്യമായ ദുഃഖങ്ങളും ബാക്കിയാവുന്ന നിലിവിളികളുമാണ് ഈ കവിയുടെ നിരന്തര ആധി. ആധുനിക നാഗരികതയോട് ഇടഞ്ഞ് പരാജിതരാവുന്ന നിസ്വരായ മനുഷ്യരും ജീവജാതികളും പ്രസീതയുടെ കവിതകളിൽ നിറയുന്നു. പുറത്താക്കപ്പെട്ടവരുടെയും അടിച്ചമർത്തപ്പെട്ടവരുടെയും അനുഭവങ്ങൾ അക്ഷരങ്ങളാൽ ഇവിടെ ആവാഹിക്കപ്പെടുന്നുണ്ട്. മാഞ്ഞുപോകുന്ന ഗ്രാമീണവഴികളും വഴക്കങ്ങളും ഈ കവിതകളിൽ തെഴുത്തുനിൽക്കുന്നു. പോയകാലത്തിന്റെ നന്മകളും കൈവിട്ടു പോയ സ്വപ്നങ്ങളും തിരികെ ലഭിക്കാനുള്ള പ്രാർത്ഥനയാണ് ഈ കവിക്ക് കവിത.”

“വിളിപ്പുറത്തൊരു വാക്കുണ്ട്
വിതുമ്പി നിൽക്കുന്നു.
തിരിച്ചുപോരികെന്നാരോ വിളിച്ചെങ്കിലും
കടക്കൺ ചുവപ്പും
കളിക്കുറുമ്പുമായ്
പിണങ്ങിനിൽപ്പാണരികിലാണെങ്കിലും
മഷിക്കറുപ്പിലായ്
പടർന്നൊലിച്ചെന്റെ
മനംനനച്ചിടും
കവിതയാകുവാൻ
വിളിക്കയാണു ഞാൻ
തിരിച്ചുപോരുമോ..”

വാക്കിന്റെ കൂടുതേടി കവിതകളിലേക്ക് വാക്കുകളെ തിരിച്ചു വിളിക്കുന്ന കവിയേയാണ് ഈ വരികളിൽ നമുക്ക് വായിച്ചെടുക്കാനാവുക.

“ഒരിക്കലെങ്കിലും എനിക്ക് വളരണം
ഒരു കടുന്തുടി എന്നെ ഉണർത്തണം
കിളിപ്പാട്ടിനൊത്ത്
പാടണം തളരുവോളം
പലനിറങ്ങളിൽ മിഴിതെളിയണം
കിളിമൊഴികളാൽ അമ്മതൻ
മനം നിറയണം.
ഒരു ശലഭമായ് പുസ്തകത്താളിലുണരണം
മയിൽപ്പീലിപോലൊരു
പ്രതീക്ഷയാവണം.
ഒടുവിൽ
അമ്മയ്ക്കൊരു തണൽമരം
അച്ഛനൊരു ഊന്നുവടി
വരും ജന്മത്തിലെങ്കിലും.”

വരും ജന്മത്തിലെങ്കിലും അമ്മയ്ക്കൊരു തണൽമരവും അച്ഛനൊരു ഊന്നുവടിയാവൻ കൊതിക്കുന്ന എൻഡോസൾഫാൻ ബാധിച്ച ഒരു കുഞ്ഞിന്റെ നിറമാർന്ന സ്വപ്നങ്ങളാണ് ഈ വരികളിൽ നിറയെ..

“എടുത്തില്ല ഞാനൊന്നുമ്മേ നിങ്ങളുടെ
തെടുത്തില്ലയൊന്നുമ്മേ നേരിതാണേ
മാനിഷാദ പാടിയൊരാദികവിയെവിടെ
കാടിനെപ്പോറ്റും കറുത്ത ദൈവങ്ങളെവിടെ
സാന്ത്വനപ്പച്ചയായ് കാറ്റിനോടൊപ്പമെത്തുന്ന
നാട്ടുദൈവങ്ങളെവിടെ
സഹ്യപുത്രവിലാപമുയരുന്നു വീണ്ടും
മുളന്തണ്ട്മൂളുന്നുവനരോദനം
തരിക ഞങ്ങളുടെ തടിനിയെ
തരിക ഞങ്ങൾക്കു നീലവാനം..”

വിശന്നു വലഞ്ഞു ഇത്തരി ഭക്ഷണം മോഷ്ടിച്ച കുറ്റത്തിന് പുരോഗമന ജനത അടിച്ചു കൊന്ന അട്ടപ്പാടിയിലെ മധുവെന്ന മനുഷ്യന്റെ ചോദ്യങ്ങളെ കവി തന്നിലൂടെ വീണ്ടുമുയർത്തുന്നു. മനുഷ്യർ കൊള്ള ചെയ്ത അവരുടെ കാടിനെ, ആകാശത്തെ അവർക്ക് തന്നെ നൽകാൻ കവിതയിലൂടെ കവി ആവശ്യപ്പെടുന്നു.

“അസ്തിത്വത്തിന്റെ
അടയാളവും പേറി
വരിനിൽക്കുമ്പോൾ-
പേരുമാഞ്ഞ വാറോലകൾ
വേരു നഷ്ടപ്പെട്ടവനെ നോക്കി
കണ്ണുരുട്ടുന്നു.
രുചിയുടെ വകഭേദങ്ങൾ
തിരഞ്ഞ് തിരഞ്ഞ്
ദാരിദ്രന്റെ തൊണ്ടക്കുഴി
തകർക്കപ്പെടുമ്പോൾ
ആൾക്കൂട്ടത്തിന്റെ
ആരവങ്ങളിൽ
ഒരു നിലവിളി കൊല്ലപ്പെടുന്നു.”

അശാന്തിപർവങ്ങൾ എന്ന കവിത ഈ പുസ്തകത്തിലെ ഏറ്റവും മികച്ച കവിതകളിലൊന്നാണ്. ബീഫിന്റെ പേരിൽ നടന്ന ആൾക്കൂട്ട കൊലയും നോട്ട് മാറ്റാനായി വരി നിന്ന കാലവും കത്വവയിലെ ആസിഫയുടെ കൊലപാതകവും വോട്ട് രേഖപ്പെടുത്തിയവരെ ചിത്രങ്ങളായി മാറ്റുന്ന ദൈവനീതിയും കവിതയിൽ കവി വരച്ചുകാട്ടുന്നു. അതിനാൽ തന്നെ ഈ കവിത ഇന്നിന്റെ രാഷ്ട്രീയത്തെ കൃത്യമായി അടയാളപ്പെടുത്തുന്നു.

പെൺ നിലവിളികളും പെണ്ണനുഭവങ്ങളും പാതി വിടർന്ന കുഞ്ഞുങ്ങളും ഗ്രാമകാഴ്ചകളും പ്രളയവും പ്രണയവും മഴയും ബാല്യകാല ഓർമകളും നഷ്ട ബോധങ്ങളും പുഴകളും വയൽ വരമ്പുകളും സഖാവ് പുഷ്പനും രോഹിത് വെമുലയുമൊക്കെ കവിതകളിൽ വിഷയങ്ങളായി കടന്നു വരുന്നുണ്ട്.

കവിതകൾ അവതരിപ്പിച്ച ഭാഷയും വിഷയങ്ങൾ പറയുമ്പോഴുള്ള കൈയൊതുക്കവും ഈ കവിയുടെ പ്രത്യേകതയാണ്. “ആത്മാനുരാഗിയാകാതെ ആത്മബോധമുള്ള മനുഷ്യനാവാനുള്ള സൗന്ദര്യാത്മക കലാപമാണ് പ്രസീതയുടെ കവിതകളിലുള്ള അകപ്പൊരുൾ” എന്ന് കൂടി ആമുഖത്തിൽ സോമൻ കടലൂർ പറഞ്ഞു വെക്കുന്നുണ്ട്.

വളരെ നല്ല വായനാനുഭവമാണ് “ഓർമയിലെ നക്ഷത്രങ്ങൾ” എന്ന പുസ്തകം ഈയുള്ളവന് സമ്മാനിച്ചത്. ഡോ. കെ. പ്രസീത എന്ന എഴുത്തുകാരിയിൽ നിന്ന് ഇനിയും മികച്ച രചനകൾ ഉണ്ടാവട്ടെയെന്ന് ആത്മാർഥമായി ആശംസിക്കുന്നു. നന്മകൾ നേരുന്നു, ഒപ്പം പ്രാർത്ഥനയും.

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം) editor@athmaonline.in

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.

Leave a Reply

Most Popular

ആരോഗ്യമുള്ള അമീബകൾ

കവിത ഭാഗ്യശ്രീ രവീന്ദ്രൻ വി. ആർ സൂത്രവാക്യങ്ങളിലേക്ക് വിവർത്തനം ചെയ്ത സൂക്ഷ്മലോകങ്ങളെ ഈ നോട്ടുബുക്കിൽ നിങ്ങൾ വായിക്കും. പക്ഷേ, "ആരോഗ്യമുള്ള അമീബകളാണ് ഈ ഗവേഷണത്തിന്റെ ഐശ്വര്യം" എന്ന് നിങ്ങളിതിൽ കാണില്ല. എന്തെന്നാൽ പ്രസിദ്ധീകരണയോഗ്യമല്ലാത്ത വസ്തുതകളാണ് ഗവേഷണജീവിതത്തിന്റെ യാഥാർത്ഥ്യമെന്ന് ആരും പറയാറില്ല. പറയാത്തതുകൊണ്ട് അതൊന്നുമില്ലെന്നല്ല, മറിച്ച് മിണ്ടാത്തതുകൊണ്ട് ഗവേഷകരുണ്ട്, ഉണ്ടാകുന്നുമുണ്ട് എന്നതാണ് വാസ്തവം. ശാസ്ത്രീയമായ ഒരുദാഹരണം നോക്കൂ: "അനുസരണയുള്ള വിദ്യാർത്ഥിനി...

ഓർമ്മച്ചുരങ്ങളുടെ ചൂടും തണുപ്പും

സുരേഷ് നാരായണൻ ഓർമ്മകൾ പലതരമുണ്ട്. മഴ നനഞ്ഞതു മുതൽ മന്ത്രകോടി കൊടുത്തതു വരെ. മറവിക്കു പണയം വെച്ചതുമുതൽ മരണത്തിനു ബലിയിട്ടതു വരെ. ബത്തേരിയുടെ മാനസപുത്രനായ അർഷാദ് ബത്തേരി നമ്മെ ക്ഷണിക്കുകയാണ് ഓർമ്മച്ചുരങ്ങളുടെ ഒളിത്തണുപ്പുകളിലേക്ക്! ചുരംകയറുകയാണ് ഇറങ്ങുകയാണ് എന്ന...

ആരവങ്ങളില്ലാതെ- അകലങ്ങളിൽ സമാന്തര എൽ.എൻ.വി ഓൺലൈൻ യുവജനോത്സവം

കോവിഡ് മഹാമാരിയുടെ പശ്ചാത്തലത്തിൽ മുടങ്ങിക്കിടക്കുന്ന സ്കൂൾ യുവജനോത്സവത്തിന് ബദൽ സാധ്യതകൾ തേടുകയാണ് നാടക പ്രവർത്തകുടെ ആഗോള ഓൺലൈൻ കൂട്ടായ്മയായ ലോക നാടക വാർത്തകൾ. ഒക്ടോബർ, നവംബർ, ഡിസംബർ മാസങ്ങളിൽ റിഥം ഹൗസ് പെർഫോർമിങ്ങ്...

രമണി

കവിത മാനസി പി.കെ രമണിയെ വീണ്ടും കാട്ടിനുള്ളിൽ കണ്ടത്രേ. ഇത്തവണ കൊള്ളി പെറുക്കാൻ പോയ ശാന്തയാണ് രമണിയെ കണ്ടത്. പനമരത്തിന്റെ താഴെ രമണിയും, നരുന്ത് പോലൊരു ചെക്കനും. ലേശം മുരിമ ഇണ്ടെങ്കിൽ പൊരൻ്റുള്ളിൽ കൊണ്ടോകെടീ പൊലയാടിച്ചി മോളേന്ന് ശാന്ത കാർക്കിച്ചു തുപ്പി. പൊരന്റുള്ളിലിത്ര കാറ്റും, വെളിച്ചോം കിട്ടൂല ശാന്തേന്ന്...
%d bloggers like this: