Sunday, August 7, 2022

വഴി

കവിത
സുവിൻ വി.എം

അച്ഛാച്ചനെ പോലെ
മെലിഞ്ഞായിരുന്നു
അച്ഛാച്ചൻ നടന്നു പോയിരുന്ന വഴിയും

എന്തേ ഇടുങ്ങി നമ്മുടെ
വഴി മാത്രം എന്ന് ഒരിക്കൽ
ചോദിക്കെ,
ഇടുങ്ങിയതല്ലീ വഴി
മെലിഞ്ഞതാണതിൻ
കുട്ടിക്കാലത്തിലത്രേ 
നിന്നെ പോലെ എന്ന് മറുപടി.

വലുതാകുമോ അപ്പോളീ വഴി ഒരുനാൾ ?

വലുതാകുമിവിടുത്തെ മനുഷ്യർക്കൊപ്പം.

കടന്നു പോയ് പകലും രാത്രിയും
സൂര്യനും ചന്ദ്രനും 
ഈ വഴിയിലൂടെ,
വഴിയിപ്പോഴും മെലിഞ്ഞൊട്ടിയൊരു
സൂക്കേടുകാരനെ പോലെ
ഒരേ കിടത്തം.

ആണ്ടിനുണ്ണാനെത്തിയ
അച്ഛാച്ചനെ പിടിച്ചിരുത്തി ചോദിച്ചു:

‘മനുഷ്യരെല്ലാം വലുതായി 
നമ്മുടെ വഴിമാത്രം
മെലിഞ്ഞു മെലിഞ്ഞങ്ങനെ..’

ചക്കരച്ചോറിൻ മധുരം നുണഞ്ഞ്,
പല്ലുകൾ പിന്നെയും കൊഴിഞ്ഞ 
മോണ കാട്ടി 
ഒരു ബുദ്ധച്ചിരി ചിരിച്ച്
വായയിൽ കുടുങ്ങിയ
തേങ്ങാപ്പൂള് തുപ്പിക്കളഞ്ഞ്
അച്ഛാച്ചൻ പറഞ്ഞു:

‘ഹൃദയത്തിലിടം പെരുക്കാതൊരു
മനുഷ്യനും വളരുന്നുണ്ടോ ഉലകിൽ ഉടൽകൊണ്ടു മാത്രം..!’

തവളയെ വിഴുങ്ങിയ പാമ്പിനെ പോലെ ,
ഓടിപ്പോകാനാകാതെ
കിടക്കുന്നൊരാ വഴി 
പിന്നെയും നടന്നു നോക്കവേ,
ആണ്ടിന്റെ രാത്രി
ഊണ് കഴിഞ്ഞാത്മാക്കൾ
മതിലിൻ മോളിലിരുന്ന്
പുറം ചൊറിഞ്ഞ്
ചിരിക്കുന്നൊരാ ഒച്ച കേട്ട് 

താടിക്കു കയ്യും കൊടുത്തു
കിടക്കുന്നു വഴി….!

SUVIN
ചിത്രീകരണം : സുബേഷ് പത്മനാഭൻ


ആത്മ ഓൺലൈൻ വാട്ട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.

5 COMMENTS

Comments are closed.

spot_img

Related Articles

നീന്തൽ

കവിത  യഹിയാ മുഹമ്മദ് കടൽ. കുഞ്ഞിനെ കൈവെള്ളയിൽ കിടത്തി കരയിലേക്ക് നീന്താൻ പഠിപ്പിക്കുന്നു. വെള്ളത്തിൽ നീന്തുന്നത് പോലെ എളുപ്പമല്ലല്ലോ കരയിലെ നീന്തൽ കല്ലും മുള്ളും നിറഞ്ഞത് കൊണ്ട് മേനിയാകെ ഉരഞ്ഞു പൊട്ടും. കടൽ കുഞ്ഞ് നീന്തി നീന്തി നാടും കാടും കടന്ന് മലയുടെ ഉച്ചി വരെയെത്തി. കടലെത്ര തിരിച്ചുവിളിച്ചിട്ടും അവനുച്ചിയിൽ നിന്ന് താഴെക്കിറങ്ങി വന്നതേയില്ല. കുഞ്ഞുങ്ങൾ. വികൃതിക്കുരുന്നുകളുണ്ടോ പറയുന്നത് കേൾക്കുന്നു! നീന്തിപ്പോയ...

കല്ലുവിളയിലെ കവടികളിസംഘം

കഥ ബിനുരാജ് ആർ. എസ് 1. "തീട്ടം ബൈജൂന്റണ്ടി ഞെരടി ഒടയ്ക്കണം", സേവിയും ഗോപനും തീരുമാനിച്ചു. "ഇനി ഒരുത്തനോടും അവനിങ്ങനെ കാണിക്കരുത്. കുറേ നാളായി പല കാര്യങ്ങൾക്ക് ഓങ്ങി വെക്കണ്. നമ്മളക്കൊണ്ടെന്തക്ക പറ്റോന്നവന് കാണിച്ച് കൊടുക്കണം." ഒരു...

തോട്ടോഗ്രഫി 2

തോട്ടോഗ്രഫി 2 പ്രതാപ് ജോസഫ് "a good photograph is knowing where to stand" Ansel Adams നിൽപ്പ്‌ വെറും നിൽപ്പല്ല, നിലപാടുകൂടിയാണ്‌. എവിടെ നിൽക്കണം/ എന്ത് നിലപാടെടുക്കണം എന്നറിയുന്നതാണ്‌ ജീവിതത്തിലെയും ഏറ്റവും അനിവാര്യമായ അറിവ്‌. ഫോട്ടോഗ്രഫിയും...
spot_img

Latest Articles