കവിത
ലിജി
പാവമീപ്പകലിന്റെ കോമളഗാത്രം
കനൽച്ചൂടേറ്റു കിതയ്ക്കുന്നു.
കാണുമ്പോൾ പൊള്ളും കണ്ണിൽ
വറ്റിയ കണ്ണീർച്ചാലിൻ
പാടുപോൽ ഞരമ്പുകൾ നീലിച്ചു കിടക്കുന്നു.
സൂര്യനാം പതക്കത്തെ
താലിയായ് ധരിക്കുന്ന
ഭൂമിയേപ്പോലെ നീറും
മറ്റൊരു പെണ്ണാണു ഞാൻ.
നീയൊരു സ്വപ്നം പോലെ
പെയ്തു പോയെന്നാകിലും
കേവലം പുല്ലിൻ മൗന
മോഹമായ്പോലും കിളിർ
ത്തീടുവാനരുതാതെ
യീവെറും മണ്ണിൽ വെന്ത
വിത്തു പോലുറുമ്പുള്ളൂ
കാരുമ്പോൾ നോവാൻ...