Friday, July 1, 2022

ഉമൈബ

കവിത
ഷിംന സീനത്ത്

ഏതാകൃതിയിൽ
നീട്ടിപ്പരത്തിയാലും
ചുട്ടെടുക്കുമ്പോൾ
ഒരേ ഛായയിൽ ചുരുണ്ടിരിക്കും
ഉമൈബയുടെ പകലുകൾ

പലജാതി പ്രശ്നങ്ങൾ
മുടികളിലൂടെ
നഖങ്ങളിലൂടെ
കണ്ണിലൂടെ കയറിവരും
കുഞ്ഞിനസുഖം തീണ്ടുന്നത്
ഇന്നലെ മാറ്റിയിട്ട ഓട് പൊട്ടിയത്
തളിർത്തയില കരിഞ്ഞു പോയത്

കണ്ണേറാണ്‌
ഉമൈബ നീറിയിരിക്കില്ല

കോഴിയെ കാണാതാവുന്നത്
ചോറ് വേണ്ടാന്നു തോന്ന്ണത്
ഉറക്കമില്ലാത്തത്‌

വരത്തുപോക്കാണ്‌
ഉമൈബ നീറിയിരിക്കില്ല
മറുമരുന്നിന്
മൂത്ത ബിയ്യിന്റടുത്തേക്കൊരു
നേർരേഖ വരച്ചിടും
നെഞ്ചിലെയുണങ്ങാത്ത വറ്റ്
കിതച്ചു കിതച്ചൊരു കാറ്റാവും
ഇന്നിനെയുടുത്ത്
നിലം തൊടാതെ
നീട്ടിയൊരു നടപ്പാണ്

അങ്ങോട്ടുള്ള യാത്രയിൽ
നടപ്പാത മരുഭൂമിയാകും
കാലിനു തീപിടിക്കും

ബിയ്യ്‌ കാലങ്ങളായി
വഴറ്റിയെടുത്ത
നോട്ടമെറിയും
ഉമൈബ ചരട് മുറുകെപ്പിടിച്ചിരിക്കും
കണ്ണുകളടയ്ക്കും
ബിയ്യ് ഹാളിറാകും
കുരുക്കഴിക്കലിന്റെ നിമിഷങ്ങൾ
പൊരിവെയിൽ
പലവർണ്ണങ്ങളായഴിഞ്ഞ്‌
ഉമൈബയെ തഴുകും

തിരിച്ചിറങ്ങുമ്പോൾ
കാട്ടുതീയിൽ
ഹൃദയം പുഷ്പിക്കും
സുഗന്ധം രോമാവരണത്തിൽ
പ്രവേശിച്ചൊരു നദിയുണ്ടാകും
തീരത്തിരുന്ന്
തേൻചേർത്തൊരു മഞ്ഞുകണം ഭക്ഷിച്ച്‌
പതിയെ
മറ്റൊരാകൃതിയിലുള്ള
പകലിലേക്കിറങ്ങും
കാലിന് തീപിടിക്കും
ആരുമറിയാതെ ദൈവമൊരു
ഫോർ ലൂപ്പിടും

ഹാളിർ: വെളിപ്പെടൽ
ബിയ്യ് : ബീവി


ആത്മ ഓൺലൈൻ വാട്ട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക

ആത്മ ഓൺലൈനിലേക്ക് നിങ്ങൾക്കും സൃഷ്ടികൾ അയക്കാം: (ഫോട്ടോയും ഫോണ്‍ നമ്പറും സഹിതം)
Email : editor@athmaonline.in

ആത്മ ഓൺലൈനിൽ പ്രസിദ്ധീകരിക്കുന്ന രചനകളിലെ അഭിപ്രായങ്ങൾ രചയിതാക്കളുടേതാണ്. അവ പൂർണമായും ആത്മയുടെ അഭിപ്രായങ്ങൾ ആകണമെന്നില്ല.

spot_img

Related Articles

ഇനിയൊരിക്കലും ആവർത്തിക്കപ്പെടാത്ത രാത്രിയും പാട്ടും

ഗസൽ ഡയറി ഭാഗം 3 മുർഷിദ് മോളൂർ ഇനിയൊരിക്കലും ആവർത്തിക്കപ്പെടാത്ത രാത്രിയും പാട്ടും ലഗ് ജാ ഗലേ.. അതുകൊണ്ട് നീ എന്നെ കെട്ടിപ്പിടിച്ചിരിക്കുക.. ലഗ് ജാ ഗലേ, ഫിർ യെ ഹസീൻ രാത്ത് ഹോ ന ഹോ.. ഇത്ര മനോഹരമായൊരു...

നദിയെ കണ്ണുകളാക്കുന്ന കവിതകള്‍ (വിനു ജോസഫിന്റെ കവിതകളുടെ വായന )

കവിതയുടെ കപ്പൽ സഞ്ചാരങ്ങൾ ഡോ. രോഷ്നി സ്വപ്ന ലോറൻസ് ബിനിയോൺ 1914 ൽ എഴുതിയ കവിതയാണ് For the Fallen. ഒന്നാം ലോകമഹായുദ്ധത്തിനു ശേഷം വന്ന കവിതകളിൽ നഷ്ടങ്ങളെയും ഗൃഹാതുരത്വത്തെയും കുറിക്കുന്ന ഏറ്റവും ശക്തമായ രചനകളിൽ...

Manila in the Claws of Light

ഗ്ലോബൽ സിനിമ വാൾ മുഹമ്മദ് സ്വാലിഹ് Film: Manila in the Claws of Light Director: Lino Brocka Year: 1975 Language: Philippino 'നിങ്ങള്‍ക്ക് കിട്ടേണ്ട കൂലി കാശ് കൊടുത്ത് വാങ്ങേണ്ടിവരിക, അത് നിങ്ങളുടെ സ്വന്തം കൊഴുപ്പില്‍ നിങ്ങളെ...
spot_img

Latest Articles